2026-njy ýylyň Nissan Leaf elektrik modeli «Women’s Worldwide Car of the Year» bäsleşiginde ýeňiş gazanyp, iň ýokary — «Supreme Winner» diýen ada mynasyp boldy.
Ses bermäge 55 ýurtdan 86 sany zenan awto-synçysy gatnaşyp, olar alty kategoriýa boýunça 55 modele baha berdi. Leaf ilki iň gowy ykjam awtomobil diýlip ykrar edildi. Finalda bolsa ol Skoda Elroq, Mercedes-Benz CLA, Hyundai Ioniq 9, Toyota 4Runner we Lamborghini Temerario ýaly bäsdeşlerinden öňe geçdi.
WWCOTY-nyň prezidenti Marta Garsiýa bäsleşigiň örän çekeleşikli geçendigini, ýöne Leaf modeliniň elýeterliligi, rahatlygy we ulanmakda ýönekeýdigi bilen ünsi özüne çekendigini belledi. Täzelenen gurluş salonyň giňligini has-da artdyrdy, elektrik hereketlendiriji ulgamy bolsa gündelik ulanyşda has netijeli we amatly boldy. Hut şeýle hemmetaraplaýynlyk modeliň ýeňiş gazanmagynda esasy sebäp boldy.
WWCOTY bäsleşigi 2009-njy ýyldan bäri geçirilýär. Ol «zenan awtomobillerini» saýlamaýar-da, zenan žurnalistleriň nukdaýnazaryny hasaba almak bilen, modellere hünär derejesinde baha berýär. Baha bermekde awtomobiliň dinamikasy, rahatlygy, funksionallygy, netijeliligi we alyjy üçin umumy gymmaty ýaly ölçegler göz öňünde tutulýar.
Leaf modeliniň ikinji nesli dünýä bazaryndaky ornuny berkitmegini dowam edýär: täzelenen dizaýny, giňeldilen funksiýalary we ýokary netijeliligi bu modele iň uly halkara awtomobil bäsleşikleriniň birinde ynamly ýeňiş gazanmaga mümkinçilik berdi.
