Ford kompaniýasynyň ýolbaşçysy Jim Farli Rim papasy Lew XIV-ä ýolsuz ýerlerde sürmek üçin niýetlenen Ford Explorer awtoulagynyň ýörite görnüşini gowşurdy. Bu awtoulag 2026-njy ýylyň «Ford Explorer Platinum» modeliniň esasynda taýýarlanyp, hromlanan detallary bolan gara reňkli kuzowa hem-de «DA POPE» we «LEO XIV» diýen şahsy döwlet belgilerine eýedir.
Ulagyň esasy aýratynlyklary onuň salonynda jemlenýär. Içki bezegde iki reňkli deri ulanylyp, papanyň doglan şäheri bolan Çikagonyň baýdagynyň nyşanlary we şäheriň keşbi çekilipdir. Bosagalarynda Mukaddes Petr bazilikasynyň suratlary ýerleşdirilen ulag tehniki taýdan Ýewropanyň radioýaýlymlaryny kabul edip bilýän ses ulgamy bilen enjamlaşdyrylandyr.
Awtoulagyň kapotynyň aşagynda 3,3 litrlik, 318 at güýjüne deň bolan V6 gibrid motory ýerleşdirilipdir. Häzirki wagtda bu gibrid ulgamy esasan «Police Interceptor» atly polisiýa modellerinde ulanylýar. Jim Farliniň aýtmagyna görä, Rim papasy täze ulagda az wagtlyk gezelenç etdi we onuň şahsy bezeglerine ýokary baha berdi.
Bu awtoulag katolik ybadathanasynyň baştutany üçin ýörite döredilen ýeke-täk nusgadyr.
