Samsung özünde kamera we emeli aň ulgamyny jemleýän akylly äýnekleriň üstünde işleýär. Täze enjam baradaky meýilnamalary kompaniýanyň mobil bölüminiň wise-prezidenti Jeý Kim Barselonada geçirilen «MWC 2026» sergisinde mälim etdi.
Onuň aýtmagyna görä, äýnegiň kamerasy ulanyjynyň gözleriniň derejesinde ýerleşdiriler we smartfon bilen sazlaşykly hereket eder. Kameranyň üsti bilen alnan maglumatlar bolsa telefona geçiriler we şol ýerde işleniler.
Täze enjamyň esasy aýratynlyklarynyň biri, emeli aňyň ulanyjynyň garaýşynyň ugruny yzarlap bilmegidir. Jeý Kim äýnegiň özünde ekranyň bolup-bolmajakdygy baradaky soraga anyk jogap bermedi. Emma ol Samsung-yň ekosistemasynda eýýäm smartfonlar we akylly sagatlar ýaly ekranly enjamlaryň bardygyny, olaryň hem şeýle wezipäni ýerine ýetirip biljekdigini belledi. Şeýle-de, ol göwrümli garyşyk hakykat (MR) garnituralaryndan tapawutlylykda, hut äýnekleriň indiki nesliň EA-ly enjamlary üçin iň amatly görnüşdigini aýtdy.
Qualcomm kompaniýasynyň ýolbaşçysy Kristiano Amon hem Samsung-yň bu täze önüminiň 2026-njy ýylda satuwa çykarylyp bilinjekdigini tassyklady. Onuň pikiriçe, akylly äýnekleriň ulanyjynyň gözlerine we gulaklaryna ýakyn ýerleşmegi «agent» görnüşli goşundylar üçin örän amatlydyr. Bu aýratynlyk emeli aňyň adamyň adyndan taksi çagyrmak ýa-da myhmanhanada ýer bronlamak ýaly işleri ýerine ýetirmegine mümkinçilik berer.
