"Bring a Trailer" onlaýn auksionynda 2003-nji ýylyň Ford Mustang SVT Cobra kupesi 175 müň dollara satyldy. Bu mukdar täze Mustang-yň ABŞ-daky başlangyç bahasyndan (32,6 müň dollar) bäş esse töweregi gymmatdyr. Beýle ýokary bahanyň esasy sebäbi bolsa ulagyň saklanyş ýagdaýydyr. Aslyýetinde, 23 ýyllyk taryhy bolan bu ulag täze maşyn diýen ýalydyr, çünki onuň geçen ýoly bary-ýogy 20 kilometr.
Aslynda, 2003-nji ýylyň Mustang SVT Cobra nusgasy örän seýrek model hasaplanmaýar. Diňe şol ýylyň özünde bu seriýadan 13 müňe golaý ulag öndürilipdi. Emma bu wersiýa özüniň has "agras" daşky görnüşi we ýörite sazlanan asma ulgamy bilen beýleki modellerden tapawutlanýar. Auksionda satylan bu nusga 390 at güýjüne eýe bolan 4,6 litrlik V8 hereketlendiriji we alty basgançakly mehaniki geçiriji guty bilen enjamlaşdyrylandyr.
Ulagyň hiç hili ulanylmandygyny onuň bamperlerinde we aýnalarynda heniz hem duran zawod gorag plýonkalary, şeýle-de oturgyçlaryndaky we rulundaky plastik örtükler subut edýär. Onuň enjamlaşdyrylyşy hem öz wagtyna görä diýseň baý: 17 dýuýmlyk diskler, elektrik sazlamaly sürüji oturgyjy, kondisioner, açarsyz girmek ulgamy we alty diskli CD-çenjeri bolan Mach audio ulgamy bar.
Belläp geçsek, şu ýylyň fewral aýynyň başynda ýene-de iki sany "täze" Mustangyň — 11 kilometr ýörän 2007-nji ýylyň kupesiniň we 40 kilometr ýörän 2008-nji ýylyň GT500KR modeliniň satuwa çykarylandygy mälim edilipdi, emma olaryň nähili baha satylandygy gizlinligine galdy.
