Britaniýaly suratkeş Uilliam Týorneriň ilkinji işleriniň biri iki asyryň dowamynda ilkinji gezek köpçülige görkeziler. "Abergawenni köprüsi" (1798) atly akwarel bilen çekilen kartinasy suratkeşiň doglan gününiň 250 ýyllygy mynasybetli Gainsborough’s House muzeýindäki sergide görkeziler.
Sergi 25-nji aprelde açylar.
Týorner şu işi bilen 24 ýaşynda Korollyk Akademiýasynyň iň ýaş assossirlenen agzasy bolupdy. Ilkinji sergisinden soň, kartinany meşhur portretçi Tomas Lorens satyn alypdy. Şondan bäri akwarel iş hususy kolleksiýalarda galyp, köpçülige görkezilmedi.
Häzirki eýesi bu eseri 1992-nji ýylda 71 500 funt sterlinge satyn aldy we ony ilkinji gezek muzeýe köpçülige görkezmek üçin bermäge razy boldy.
Kartina suratkeşiň Uels boýunça alty hepdelik syýahaty mahalynda döredildi. Bu eser Týorneriň tebigy atmosferany reňkler bilen bermäge bolan irki gyzyklanmasyny açyp görkezýär. Suratkeşi goldaýan peýzaž suratkeşi we akademik Jozef Farington öz gündeliginde ýagyşly tomsuň Týornere zerur atmosfera täsirlerini synlamaga kömek edendigini ýazypdyr.
Ýagşy, ýagtylygy we dumany reňkler bilen beýan edip bilmegi soňra onuň nakgaşlyk işleriniň häsiýetli aýratynlygyna öwrülipdir.
