Hytaý baýlygy 1 milliard dollardan geçýän adamlaryň sany boýunça ýene-de dünýäde birinji orna çykdy. Bu barada Hurun gözleg kompaniýasy tarapyndan taýýarlanan «Hurun Global Rich List 2026» hasabatynda bellenilýär.
Reýtingiň maglumatlaryna görä, dünýädäki milliarderleriň sany ilkinji gezek 4 müňden geçip, 4 020 adama ýetdi. Hytaý birinji orny eýeleýär — bu ýurtda 1 110 sany milliarder bar. Bu geçen ýylky görkezijiden 287 adam köpdür.
ABŞ 1 000 milliarder bilen ikinji orunda durýar — bu bolsa bir ýyl ozalkysyndan 130 adam köpdür.
Sanawdan 100-den gowrak adamyň çykandygyna garamazdan, milliarderleriň umumy sany bir ýylda 578 adam artyp, rekord derejä ýetdi. Reýtinge ilkinji gezek 726 sany täze agza goşuldy — bu bolsa ortaça her günde iki adama deňdir. Olaryň 318-si Hytaýda peýda boldy.
Üçünji orunda 308 milliarder bilen Hindistan ýerleşýär. Ondan soňra Germaniýa (171), Beýik Britaniýa (150) we Şweýsariýa (114) gelýär.
Şäherleriň arasynda Nýu-Ýork öňe saýlanýar — ol ýerde 146 milliarder ýaşaýar.
Ilon Mask 792 milliard dollar baýlygy bilen dünýäniň iň baý adamy bolmagynda galýar. Ikinji orunda bolsa baýlygy 300 milliard dollar diýlip hasaplanýan Amazon kompaniýasynyň esaslandyryjysy Jef Bezos durýar.
