Netflix meşhur serkerde Aleksandr Makedoniýaly (Isgender Zülkarneýin) we onuň halypasy, beýik filosof Aristoteliň arasyndaky gatnaşyklar barada gürrüň berýän «Aleksandr» atly täze serialy surata düşürer. Deadline neşiriniň habar bermegine görä, taslamanyň režissýory we ssenariýaçysy Žakob Tirne bolar.
Serial kanadaly ýazyjy Annabel Lionyň 2009-njy ýylda neşir edilen «Altyn ortalyk» atly taryhy romany esasynda surata düşüriler.
Wakalar b.e. öň 343-nji ýylda – Afinanyň gowşan we köşk dildüwşükleriniň artan döwründe başlanýar. Serialyň merkezinde ýaş Aleksandryň we onuň uly dogany Arrideýiň halypasy Aristotelden alýan sapaklary durýar. Romanda Aleksandr örän zehinli, emma şol bir wagtyň özünde erk edip bolmaýan derejedäki gyzma hem eýmendiriji ýetginjek hökmünde şekillendirilýär. Ol ylma bolan güýçli hyjuwy bilen özünden basybalyjy bolmagy talap edýän rehimsiz urşujy medeniýetiniň arasynda janserek bolýar.
Aristotel bolsa diňe bir alym hökmünde däl, eýsem öz okuwçylaryna «altyn ortalyk» düşünjesini — ýagny paýhaslylygy we deňagramlylygy öwretmäge çalyşýan ynsan hökmünde görkezilýär. Netijede, geljekki beýik serkerde bilen meşhur filosofyň arasyndaky garaşylmadyk dostluk taryha uly täsirini ýetirýär.
