ABŞ-nyň iň iri awiakompaniýalarynyň biri bolan «United Airlines» uçaryň içinde ýolagçylaryň özüni alyp baryş kadalaryny berkidýär. Şoňa görä, indi islendik ýolagçy uçuş wagtynda gulaklyksyz aýdym ýa-da wideo diňlese, ony uçar gatnawyndan aýyrmak ýa-da awiakompaniýanyň hyzmatlaryndan peýdalanmagy bütinleý gadagan etmek göz öňünde tutulýar.
Bu üýtgeşme gatnaw şertnamasynyň 21-nji kadasyna girizildi. Täze düzgün awiakompaniýanyň ýolagçyny uçardan düşürmäge, şeýle hem oňa wagtlaýyn ýa-da hemişelik uçuş gadagançylygyny goýmagyna hukuk berýär.
Şertnamada jemi 22 sany sebäp görkezilýär. Olaryň esasylary audio/wideo tertibi (gulaklyksyz gaty sesli aýdym ýa-da wideo diňlemek), töleg meseleleri (petek üçin tölegiň doly tölenmezligi), şahsyýeti tassyklaýan resminamalar (pasportyň ýa-da gerek resminamanyň ýoklugy), howpsuzlyk (beýleki ýolagçylara wehim salýan hereketler), saglyk ýagdaýy (mysal üçin, göwreliligiň 9-njy aýynda bolmak) ýaly bölümlerden ybaratdyr.
Şertnamada bellenilişi ýaly, eger ýolagçy 21-nji kadany bozsa we munuň netijesinde awiakompaniýa haýsydyr bir çykdajy ýa-da zyýan çekse, ýolagçy şol zyýanyň öwezini dolmaga borçludyr we bu hakda «UA-nyň 21-nji kadada görkezilen islendik hereketi edýän ýolagça hemişelik esasda gatnawyndan ýüz döndermäge hukugy bardyr» diýlip, aýratyn bellenilýär.
Geçirilen halkara sowalnamalaryň netijelerine görä, gatnaşyjylaryň takmynan 59%-i gulaklyksyz wideo görmek ýa-da aýdym diňlemek ýaly hereketleri uçuş wagtyndaky iň kejikdiriji ýagdaýlaryň biri diýip hasaplaýarlar.
Şeýlelikde, awiakompaniýanyň bu kararyny köp sanly ýolagçylaryň islegine görä gelnen netije diýip kabul edip bolar.
