Caviar kompaniýasy Samsung Galaxy S26 Ultra smartfonynyň "Totem Collection" diýlip atlandyrylýan täze premium görnüşlerini hödürledi. Bu ýörite seriýa simwoliki jandarlardan, ýagny atdan, ýolbarsdan, möjekden we laçyndan ylham alnyp döredilen modelleri öz içine alýar.
Telefonlaryň bezeginde 24 karatlyk altyn, gara titan we karbon ýaly örän gymmat bahaly materiallar ulanyldy.
Kolleksiýadaky ýolbarsly, möjekli we laçynly üç model biri-birine meňzeş dizaýnda taýýarlandy, emma atly wersiýa özüniň üýtgeşik reňkleri we yzky paneliniň bezegi bilen tapawutlanýar. Bu model Aý täze ýylyna hem-de güýçli energiýany, durmuşyň joşgunyny we hyjuwy aňladýan at simwolyna bagyşlanyp döredildi. Caviar-yň bellemegine görä, "Fire Horse" (Alawly at) modeli 24 karatlyk altyndan ýasalan barelýefe eýe bolup, onuň daşy gyzyl emal bilen bezelen ýalynlar bilen gurşalýar. Bu dizaýn smartfonda hakyky alawyň täsirini döredýär.
Bahasy 11 490 dollar bolan "Fire Horse" modeli kolleksiýanyň iň gymmat bahaly nusgasydyr. Beýleki modelleriň bahalary bolsa 10 490 dollar bilen 11 060 dollar aralygynda üýtgeýär. Belläp geçsek, bu eksklýuziw smartfonlaryň her biri örän çäkli mukdarda — bary-ýogy 19 nusgada çykarylar.
