Collecting Cars internet platformasy adaty bolmadyk, öý üçin sungat eserini — meşhur Ferrari 250 Testa Rossa sport awtoulagynyň kuzowynyň kiçi nusgasy görnüşinde diwar heýkelini auksionda satýar. Auksionyň tamamlanmagyna 24 sagatdan az wagt galanda, onuň soralýan bahasy 9107 funt sterlinge (takmynan 11 600 dollar) deňdir.
Heýkel Maranellodaky Ferrari arhiwinden asyl suratlary ulanyp, Hedley Studios tarapyndan döredildi. Şonuň üçin sungat eseri öndüriji tarapyndan tassyklanan ygtyýarly önüm hasaplanýar. Şuňa meňzeş 19 sany nusgany çykarmak meýilleşdirilýär.
Hakyky awtoulag bilen deňeşdirilende, kuzow dörtden bir esse kiçeldilen. Heýkeliň uzynlygy 3,1 metr, ini bolsa 1,1 metr. Ol elde ýasalan alýuminiýden taýýarlandy — asyl ýaryş awtoulaglarynyň kuzowlary hem şeýle usul bilen taýýarlanýardy.
Ferrari 250 Testa Rossa XX asyryň iň meşhur ýaryş awtoulaglarynyň biri hasaplanýar. Ol 1957-nji ýyldan 1961-nji ýyla çenli dürli atelýeleriň kuzowlary bilen çykaryldy. Ol 3,0 litrlik Colombo V12-niň ýörite işlenip düzülen görnüşi bilen enjamlaşdyryldy.
Bu model 1958-nji, 1960-njy we 1961-nji ýyllarda “Le Manyň 24 sagadynda”, 1958-nji, 1959-njy we 1961-nji ýyllarda “Sebringiň 12 sagadynda”, 1958-nji we 1960-njy ýyllarda “Buenos-Aýresiň 1000 kilometrinde”, şeýle hem 1958-nji ýylda “Targa Florio” ýaryşynda ýeňiş gazanypdy.
