Hytaý 2026–2030-njy ýyllar üçin niýetlenen bäşýyllyk meýilnamanyň çäklerinde ilatyň ortaça ömür dowamlylygyny 80 ýaşa ýetirmegi maksat edinýär. Bu barada Hytaý Halk Respublikasynyň Saglygy goraýyş baradaky döwlet komitetiniň başlygy Leý Haýçao mälim etdi.
Onuň aýtmagyna görä, 2024-nji ýylyň ahyryna çenli ýurtda ortaça ömür dowamlylygy 79 ýaşa ýetdi. Hytaý geljek bäş ýylyň dowamynda bu görkezijini ýene bir ýyl artdyrmagy göz öňünde tutýar.
Resmi wekil bu barada Hytaýyň Kommunistik partiýasynyň Merkezi Komitetiniň 20-nji çagyryşynyň dördünji mejlisinden soň habar berdi. Mejlisde ýurdy ösdürmegiň 15-nji bäşýyllyk meýilnamasyny taýýarlamak boýunça maslahatlar tassyklanyldy.
Bu meselede keselleriň öňüni almak esasy ugurlaryň biri bolar. Häkimiýetler maşgala lukmanlarynyň ulgamyny ösdürmegi, sagdyn durmuş ýörelgesi baradaky bilimleri ýaýratmagy, şeýle hem agramyň, gan basyşynyň, gandaky lipidleriň we şeker derejesiniň gözegçiligini güýçlendirmegi meýilleşdirýär. Hroniki kesellere — ýürek-damar kesellerine, rak keseline, dem alyş ýollarynyň kesellerine we süýji keseline garşy göreşe aýratyn üns berler. Mundan başga-da, ilkinji lukmançylyk kömegini berkitmek we telemedisinany ösdürmek göz öňünde tutulýar.
Garry adamlara ideg etmek ulgamyna hem aýratyn ähmiýet berler. Hytaýda ýaşy uly raýatlaryň 310,31 milliony ýaşaýar — bu ilatyň, takmynan, 22%-ine deňdir. Raýat administrasiýasy ministrliginiň maglumatlaryna görä, 2024-nji ýylyň ahyryna çenli ýurtda garrylar üçin tas 8 million orunlyk 406 müň sany edara we desga işledi, dürli kömek pullaryny bolsa 49,45 million adam aldy.
