Žoan Laporta we Wiktor Font «Barselona» futbol klubunyň prezidenti wezipesine dalaşgär hökmünde bellige alyndy. Bu barada klubuň resmi saýtynda habar berilýär.
Saýlawlara resmi taýdan gatnaşmak üçin her bir dalaşgär klubuň agzalaryndan 2337 sany gol ýygnamalydy. Dalaşgärleriň ikisi hem bu görkezijiden geçmegi başardy. Deslapky saýlaw kampaniýasynyň üçünji gatnaşyjysy Mark Siriýa Roig ýeterlik gol toplap bilmedi: hödürlenen 2845 goldan diňe 2247-si barlagdan geçdi.
«Barselonanyň» prezidentiniň saýlawlary 2026-njy ýylyň 15-nji martyna bellenildi. Klubuň häzirki prezidenti Žoan Laporta yzygider ikinji möhlete dalaş edýär. Ol dekabr aýynda saýlawlara täzeden gatnaşmagy meýilleşdirmeýändigini aýdypdy. Emma fewral aýynda Laporta we direktorlar geňeşiniň bir bölegi täze saýlawlary geçirmek üçin wezipelerinden çekildi.
Laporta 63 ýaşynda. Ol mundan ozal 2003—2010-njy ýyllar aralygynda «Barselonanyň» prezidenti wezipesini eýeläpdi we 2021-nji ýylda täzeden kluba ýolbaşçy boldy. Bu döwürde futbol topary alty gezek Ispaniýanyň çempiony boldy, üç gezek Ispaniýanyň Kubogyny we alty gezek ýurduň Superkubogyny gazandy. Şeýle hem klub iki gezek Çempionlar ligasynyň ýeňijisi boldy, bir gezekden UEFA-nyň Superkubogyny we Klublaýyn dünýä çempionatyny utdy.
