«Barselona» futbol kluby «Nýukaslyň» çep gyraky hüjümçisi (wingeri) Entoni Gordonyň transferini resmi taýdan yglan etdi. 25 ýaşly futbolçynyň katalon kluby bilen baglaşan şertnamasy 2031-nji ýyla çenli niýetlenendir.
Bu barada «gök-gyzyl reňklileriň» X sosial ulgamyndaky resmi sahypasynda habar berildi. Klubuň paýlaşan habarynda: «Biziň hörpümize täze bir güýç goşulýar» diýlip bellenilýär.
– Barselonanyň maňa gyzyklanma bildirýändigini bir az gijräk bildim, ýöne munuň çynlakaýdygyna düşünen badyma, mende hiç hili ikirjiňlenme galmady. Men hemişe şu ýerde oýnamagy isleýärdim. Bu dünýäniň iň uly kluby. Bu transfer – meniň çagalykdan bäri arzuwym – diýip, Gordon metbugat maslahatynda aýtdy.
Mundan öň «Nýukaslyň» ýolbaşçylarynyň we klubuň Saud Arabystanly eýeleriniň «Barselonanyň» 70 million ýewro möçberindäki ilkinji teklibini kabul edendigi habar berlipdi. Metbugatyň berýän maglumatlaryna görä, şertnamanyň gutarnykly umumy bahasy goşmaça tölegler bilen bilelikde 80 million ýewrodan gowrak bolar.
Gordonyň bu transferi Katalon klubunyň taryhynda iň gymmat 7-nji transfer boldy we 2031-nji ýylda topara goşulan Antuan Grizmandan bäri iň uly şertnama hökmünde hasaba alyndy.
«Barselonanyň» taryhyndaky iň gymmat satyn alyşlaryň sanawy:
Usman Dembele — €148 mln («Borussiýa Dortmunddan»);
Filippe Koutinýo — €135 mln («Liwerpuldan»);
Antuan Grizmann — €120 mln («Atletiko Madridden»);
Neýmar — €88 mln («Santosdan»);
Frenki de Ýong — €86 mln («Aýaksdan»);
Luis Suares — €81,7 mln («Liwerpuldan»).
Gordon şu möwsümde «Nýukaslyň» düzüminde ähli turnirlerde jemi 46 oýna gatnaşyp, 17 gol urmagy we 5 sany gol pasyny bermegi başardy. Abraýly Transfermarkt portalynyň maglumatlaryna görä, futbolçynyň häzirki wagtda bazardaky hakyky bahasy 60 million ýewro deňdir.
