Aşgabatda tamamlanan küşt boýunça Türkmenistanyň çempionatynda 19 ýaşly FIDE ussady Amanmuhammet Hommadow ýeňiji boldy. Türkmen döwlet bedenterbiýe we sport institutynyň 2-nji ýyl talyby ilkinji gezek açyk kategoriýada birinjiligi eýelemegi başardy. Ol ýokary liganyň ýaryşynda 14 döwde 11 utuk toplady.
Iň güýçli sekiz küştçiniň gatnaşmagynda geçen on günlük ýaryşyň dowamynda Hommadow netijeli oýun görkezdi. Bu bolsa oňa geçen ýylyň çempiony, kümüş baýragyň eýesi Wepaly Halynyýazowdan 1,5 utuk öňe saýlanmaga mümkinçilik berdi.
Geçen ýyl Amanmuhammet Hommadow Türkmenistanyň Küşt federasiýasy tarapyndan esaslandyrylan ilkinji Gran-pri tapgyrynyň ýaryşynda ynamly ýeňiş gazanypdy.
Bürünç medala bolsa eýýäm yzygider ikinji ýyl zenanlar ýygyndysynyň baş tälimçisi Şahruh Turaýew (8,5 utuk) mynasyp boldy. Ol goşmaça görkezijiler boýunça Lebap welaýatyndan gelen zehinli mekdep okuwçysy Ilhan Çaryýewden öňe geçmegi başardy.
Ýaryşda Türkmen döwlet bedenterbiýe we sport institutynyň 1-nji ýyl talyby Ahmet Gubataýew hem 7,5 utuk bilen gowy netije görkezdi.
Ýokary liganyň netijeleri boýunça 2026-njy ýylyň sentýabr aýynda Samarkantda (Özbegistan) geçiriljek 46-njy Bütindünýä küşt olimpiadasyna gatnaşjak milli ýygyndy toparlaryň düzümi belli boldy. Erkekleriň ýygyndysyna şu çempionatyň baýrakçylary — A.Hommadow, W.Halynyýazow we Ş.Turaýew, şeýle hem halkara grossmeýsterler Saparmyrat Atabaýew we Meýlis Annaberdiýew girdi. Zenanlar ýygyndysyna bolsa ýylyň esasy toparlaýyn ýaryşynda Läle Şöhradowa, Jahan Rejepowa, Mähri Agamyradowa, Ogulsuraý Baýrambaýewa we Leýla Şöhradowa wekilçilik eder.
