Soňky hepdäniň dowamynda oýun dünýäsiniň iň esasy mowzugy Capcom kompaniýasynyň täze hödürlän Resident Evil Requiem atly horror oýny boldy. Bu oýun tankytçylar tarapyndan örän ýokary bahalandyryldy we oýunçylaryň hem gyzgyn garşylamagyna eýe boldy. Häzirki wagtda Steam hyzmatynda oýun baradaky oňyn seslenmeler 95 göterime ýetdi, Metacritic platformasynda bolsa ol iň ýokary ulanyjy bahasyny almak ugrunda Clair Obscur: Expedition 33 oýny bilen bäsleşip, rekord goýmana synanyşýar.
Oýun satuwa çykanyndan bäri bir hepde hem geçmänkä, ähli platformalarda onuň 5 milliondan gowrak nusgasy satyldy.
Bu görkeziji täze bölümiň franşizanyň taryhynda şeýle uly satuw mukdaryna iň çalt ýeten oýun bolandygyny subut edýär. Deňeşdirmek üçin aýtsak, 2019-njy ýylda çykan Resident Evil 2 Remake başlangyçda 3 million nusga satylypdy we wagt geçdigiçe seriýanyň iň köp satylan oýnuna öwrülipdi. 2023-nji ýyldaky Resident Evil 4 Remake hem iki günde 3 million satuwa ýetse-de, 5 millionlyk sepgidi diňe alty aýdan soň aşyp bildi. Resident Evil Village bolsa şol mukdara diňe sekiz aýyň içinde ýetipdi. Şunlukda, Resident Evil Requiem bu ugurda özünden öňki ähli meşhur bölümleriň rekordyny täzeledi.
2026-njy ýylyň 22-nji martynda rowaýata öwrülen bu seriýanyň döredilenine eýýäm 30 ýyl dolýar. Üç onýyllygyň dowamynda Resident Evil oýunlarynyň umumy satuwy 183 million nusgadan geçdi we Capcom kompaniýasynyň iň üstünlikli hem-de girdejili taslamasy bolup galmagyny dowam edýär.
