Wera Rubin adyndaky obserwatoriýanyň awtomat habar beriş ulgamy resmi taýdan işe başlady. Bu ölçegi ýeňil awtomobil bilen deň bolan LSST kamerasy bilen enjamlaşdyrylan iň uly ýerüsti astronomiýa taslamadyr. Kamera bir gijäniň dowamynda gijeki asmanyň müňe golaý suratyny almaga we iň kiçijik üýtgeşmeleri hem hasaba almaga ukyplydyr.
Her täze şekil teleskopyň ilkinji gezek işe girizilen pursadynda alnan surat nusgasy bilen awtomat usulda deňeşdirilýär. Soňra ýörite algoritmler täze ýyldyzlaryň partlamalary, täze asteroidleriň peýda bolmagy ýa-da gara deşikleriň işjeňligi ýaly tapawutlary tapýarlar we wakalaryň görnüşini kesgitleýärler.
Şeýle üýtgeşmeler baradaky maglumatlar dünýäniň ähli künjegindäki astronomlara gönümel ugradylýar. Maglumatlaryň geçirilmegi bary-ýogy birnäçe minut wagty alýar.
Ulgam işiniň ilkinji gijesinde dürli wakalar barada 800 müňden gowrak habarnama hasaba aldy we ýaýratdy. Geljekde bu görkezijiniň bir gijede birnäçe millliona ýetmegine garaşylýar.
Gözlegçilere örän uly möçberdäki maglumatlar bilen işlemegi ýeňilleşdirmek üçin ýörite süzgüç ulgamy göz öňünde tutulypdyr. Ol wakalary görnüşine, ýagtylygyna we beýleki parametrlerine görä saýlamaga mümkinçilik berip, iň möhüm gözegçiliklere ünsi jemlemäge kömek edýär.
LSST ulgamynyň işe girizilmegi häzirki zaman astronomiýasynyň ösüşinde möhüm tapgyr boldy we alymlaryň arasyndaky ylmy maglumatlaryň çalşygyny çaltlandyrdy.
