2026-njy ýylyň mart aýynyň başynda Hindistan we dünýädäki induist jemgyýetleri ýazyň gelmegini hem-de ýagşylygyň ýamanlykdan üstün çykmagyny alamatlandyrýan iň şagalaňly we ähmiýetli baýramlaryň biri hasaplanýan Holi baýramyny belleýär.
Şu ýyl esasy dabaralar 4-nji marta gabat geldi. Bu baýram mynasybetli şäherleriň köçeleri biri-biriniň üstüne «gulal» diýlip atlandyrylýan dürli reňkli tozgalary sepýän adamlardan doldy. Baýramçylyk bir gün öň «Holika Dahan» – ot ýakmak däbi bilen başlandy. Bu däp adamlaryň ýamanlygy ýok etmek ynanjy bilen baglanyşyklydyr.
Baýramçylyk günleri doga-dileg etmek bilen bir hatarda her öýde «gujiýa» diýlip atlandyrylýan däp bolan süýjülikler taýýarlanýar we gury ir-iýmişler goşulan sowuk süýtli içgi – «tandaý» içilýär.
Holi baýramy induizmde Wişnunyň wepaly tarapdary Prahladyň halas bolmagy we onuň janyna kast etmäge synanyşan Holikanyň otda heläk bolmagy baradaky rowaýata esaslanýar. Şeýle-de, bu festiwal Radha we Krişnanyň söýgüsine bagyşlanýar, şol sebäpli iň uly dabaralar Krişnanyň çagalygy bilen bagly bolan Mathura we Wrindawan şäherlerinde geçirilýär. Baýram mynasybetli induistik ybadathanalar ýiti boýaglar, gymmat bahaly daşlar bilen bezelýär.
Holi baýramynyň ýiti reňkleriniň şatlygy, täzelenmäni we baharyň gelmegini aňlatmakdan başga-da manysy bardyr: adamlar biri-birine dürli reňkli tozgalary sepende, durmuş gatlaklarynyň arasyndaky serhet aýrylyp, reňkine garamazdan, adamlaryň ählisiniň deňdigine bolan ynamy, agzybirligi we deňligi görkezýär.
Holi baýramy millionlarça adamy we syýahatçyny özüne çekmek bilen, Hindistanyň iň möhüm we giňden bellenilýän festiwallarynyň biri bolmagynda galýar. Dabaralar Nepalda we induist jemgyýetleri bolan dünýäniň beýleki sebitlerinde-de giňden ýaýbaňlanýar.
