Dodge kompaniýasy häzirki Charger modeliniň sekiz silindrli (V8) Hellcat hereketlendirijisi bilen üpjün edilen täze görnüşini işläp taýýarlaýar. «Mopar Insiders» neşiriniň çeşmelere salgylanyp berýän habaryna görä, awtoulagyň bu görnüşi modeliň meýilleşdirilen täzelenmesiniň çäginde peýda bolar.
Dodge Charger kupesiniň we sedanynyň 2028-nji model ýylyna çenli täzelenmegine garaşylýar. Şunuň bilen baglylykda, modeliň iň güýçli görnüşiniň tanyşdyrylyşy eýýäm 2027-nji ýylda geçirilip bilner.
Taslamanyň işlenip düzülmegine golaýda täzeden dikeldilen SRT bölümi gatnaşýar. Bu ugruň ilkinji modeli Ram 1500 TRX pikaby boldy we neşiriň maglumatyna görä, Charger üçin hereketlendirijini hut şol modelden almak meýilleşdirilýär. Gürrüň 788 at güýjüni we 923 Nm aýlaw pursadyny öndürýän 6,2 litrlik V8 hereketlendirijisi barada barýar.
Restaýlinge (dizaýnyň täzelenmegine) çenli galan wagty kompaniýanyň goşmaça synaglar üçin ulanjakdygy bellenilýär. STLA Large platformasy içinden ýanýan hereketlendirijileri gurnamaga mümkinçilik berýär, ýöne uly we has kuwwatly motorlaryň utgaşdyrylmagy giňişleýin barlag maksatnamasyny talap edýär.
Kompaniýa bahasy, takmynan, 100 müň dollarlyk Ram 1500 TRX modeline bolan ýokary islegi maliýe delili hökmünde görkezýär.
Dodge Charger Hellcat-yň işlenip düzüljegi heniz resmi taýdan tassyklanmady.
