Stellantis awtoulag konserni öz taryhynda çeken ilkinji ýyllyk zyýany barada habar berdi. CNBC-niň habaryna görä, 2025-nji ýylyň netijeleri boýunça kompaniýa 26,3 milliard dollar zyýana galdy.
Ýitginiň esasy sebäbi elektromobilleriň önümçiligine çalt depginde geçmek üçin gönükdirilen maýa goýumlarynyň hatardan çykmagy boldy. Kompaniýa bu ugruny ösdürmäge goýlan 26,3 milliard dollarlyk aktiwleri ýatyrdy. Bu çözgüt, elektrik ulaglaryna bolan islegiň çaklamalardan pes bolmagy we Ýewropa Bileleşiginiň 2035-nji ýyldan hereket etmeli bolan içki ýangyç hereketlendirijili ulaglary satmagy gadagan etmek hakyndaky kararynyň güýjüni ýitirmegi bilen baglanyşyklydyr. Hut şol zerarly Stellantis öz maksatnamasyna gaýtadan garamaly boldy.
Kompaniýanyň baş müdiri Antonio Filosa işewürligiň täze gurluşynyň müşderileriň elektrik, gibrid we içki ýangyç hereketlendirijileriň ähli spektrinden saýlamak azatlygyny göz öňünde tutup geçiriljekdigini aýtdy.
Şeýlelikde, Stellantis tizleşdirilen ýagdaýda sap elektrik ulgamyndan ýüz öwürýär. Şuňa meňzeş ädimleri ozal GM, Ford, Honda we BMW ýaly beýleki awtoulag öndürijileri hem ädipdiler.
2025-nji ýyldaky zyýanyň goşmaça faktory ABŞ tarapyndan girizilen import paçlary boldy. Maliýe netijelerine baglylykda kompaniýa geçen ýyl üçin diwidentleriň tölegini togtadýandygyny hem yglan etdi.
2024-nji ýylda Jeep öndürijisi takmynan 6,5 milliard dollar peýda alypdy.
