Lenovo kompaniýasy Barselonada geçirilýän Mobile World Congress (MWC) sergisinde özüniň täze taslama enjamyny — Legion Go Fold modelini görkezdi. Bu Windows ulgamynda işleýän, OLED ekranly we aýrylyp-dakylýan dolandyryjyly oýun planşetidir.
Enjam çeýe ekran bilen üpjün edilen. Eplenen ýagdaýynda onuň ekranynyň ölçegi 7,7 dýuým, açyk ýagdaýynda bolsa 16:10 gatnaşykly 11,6 dýuýma deňdir. Ekrany epläp we dikligine öwrüp, bir wagtyň özünde hem oýun oýnamak, hem-de göni ýaýlym ýa-da oýnuň geçişini görmek üçin iki sany aýry displeý hökmünde ulanyp bolýar.
Dolandyryjy (kontroller) planşete ýörite berkidijiler arkaly dakylýar. Aýry bir esbap arkaly olary birleşdirip, simsiz geýmpad ýasap bolýar. Sag tarapdaky kontrolleri dik syçan hökmünde ulanmak hem mümkin. Onuň üstünde prosessoryň agramlylygyny we wagty görkezýän tegelek ekran ýerleşdirilen, şeýle hem ol trekpad (syçanyň wezipesini ýerine ýetirýän meýdança) hökmünde-de işleýär. Enjamyň dolandyryjy bilen bilelikdäki umumy agramy 868 gramdyr.
Toplumyň içine planşeti ykjam noutbuga öwürýän direg-daşlyk we aýrylýan Bluetooth-klawiaturasy girýär. Görkezilen nusga Intel Core Ultra 7 258V prosessory, 32 GB operatiw ýady we 1 TB SSD saklaýjysy bilen üpjün edilendir.
Täze önümiň satuwa çykaryljak wagty entek mäilm edilmese-de, bahasy 1000 ABŞ dollaryndan ýokary bolar diýlip çaklanylýar.
