Lenovo kompaniýasy 2026-njy ýylyň martyň başynda Barselonada geçiriljek «Mobile World Congress» (MWC) sergisinde Yoga Book Pro 3D konseptual noutbugyny görkezer. Enjam baradaky maglumat 28-nji fewralda X platformasyndaky Evleaks insaýderi tarapyndan çap edildi.
Öndüriji önümiň satuwa çykarylyp biljekdigini çaklaýar.
Enjam her göz üçin biri-birinden az-kem tapawutlanýan iki sany şekili taslaýan displeýli stereoskopiýa şekillendiriş tehnologiýasyna esaslanýar. Bu usul emeli aň algoritmleriniň kömegi bilen ýörite äýnekleri ulanmazdan çuň görüp bilmek duýgusyny döredýär. Noutbugyň esasy hyrydarlarynyň arhitektorlar, dizaýnerler, hem-de üç ölçegli modeller we wizualizasiýa bilen işleýän beýleki hünärmenler bolar diýip, göz öňünde tutulýar.
Gurluşy boýunça Yoga Book Pro 3D adaty noutbuga meňzeýär. Açylanda korpusyň aşaky ýarymy adaty klawiaturanyň deregine ikinji sensor ekrany bolup gidýär. Şoňa görä, tekst ýazmak üçin aýratyn Bluetooth-klawiatura gerek bolýar. Enjam ekranyň gyşarma burçuny sazlamaga mümkinçilik berýän gurlan direg bilen üpjün edilendir.
Önümde esasy tehniki çäklendirme programma üpjünçiligi bilen utgaşyklylyk bolup galýar. Häzirki zaman programmalaryň we oýunlaryň köpüsi tebigy 3D-şekillendirişi üçin uýgunlaşdyrylmadyk, bu bolsa şekiliň hilini peseldýär. Şekiliň kesilip düşmek täsirini aradan aýryp bilýän göz yzarlama (eye tracking) tehnologiýasy enjamda resmi taýdan tassyklanmady.
