Ford konserni 4 380 609 awtomobili öz içine alýan giň gerimli hyzmat ediş kampaniýasyny yglan etdi. Yzyna çagyryş dürli modellerdäki pikaplary, wnedorožnikleri we furgonlary öz içine alýar. Mesele tirkeg çekilen wagty ýüze çykýan programma säwligi bilen baglanyşyklydyr.
Bu näsazlygy mart aýynda başlanjak simsiz programma täzelenmesi (OTA update) arkaly aradan aýyrmak meýilleşdirilýär.
Tirkegiň elektrik enjamlarynyň awtomobiliň ulgamyna birikdirilende ýüze çykýan bökdençlik sebäpli, tirkegiň tormoz yşyklary (stop-signallar) we öwrüm görkezijileri işlemän galyp bilýär. Ford we Ýol hereketiniň howpsuzlygynyň Milli administrasiýasy munuň ýol-ulag hadysasynyň töwekgelçiligini artdyrýandygyny belleýärler. Şeýle hem bu ýagdaý ulaglaryň tehniki talaplara laýyk gelmezligine sebäp bolýar.
Yzyna çagyryşa degişli modelleriň aglabasy F-seriýasy, Maverick we Ranger pikaplary bolup durýar. Şeýle hem Expedition we Navigator wnedorožnikleri, E-Transit furgonlary degişli.
Bu awtomobilleriň ählisi 2022-nji we 2026-njy ýyllar aralygynda öndürilen ulaglardyr.
Ford bu mesele bilen bagly 400-den gowrak kepillik ýüz tutmasyny hasaba aldy. Ýol-ulag hadysalary barada maglumat ýok. Motor1 neşiriniň habar bermegine görä, bu eýýäm ýylyň başyndan bäri konserniň onunjy hyzmat ediş kampaniýasydyr.
