Mercedes-Benz awtoulaglardaky çaýkanmanyň derejesini peseltmek üçin niýetlenen ulgamy patentledi. Bu tehnologiýada işjeň podweska ýa-da wibrokompensasiýa ýaly çylşyrymly tehniki çözgütlere derek, kompaniýa ýelejiretme ulgamyny we içki LED yşyklandyryşy ulanýar.
Çaýkanma keseli ýa-da kinetoz, göreçden we westibulýar apparatdan gelýän signallaryň gabat gelmeýän mahaly ýüze çykýar. Mysal üçin, hereket edýän awtoulagda okaýan wagtyňyz gözler hereketsiz obýekte seredýär, emma içki gulak hereketi duýýar. Adamlaryň 5% -ine çenlisi açyk bildirýän çaýkanma keselinden ejir çekýär.
Patente görä, Mercedes-iň ulgamy ulagyň hereketine baglylykda howa akymynyň intensiwligini we ugruny üýtgedip bilýär. Akym tizlik artdyrylanda güýçlenýär we tormoz tutulanda gowşaýar. Şeýle-de garşydan gelýän ýeliň täsirini döredýän pulsirleýji režimleriň hem ulanylmagy ähtimal. Bu bolsa ýolagçynyň hereketi has gowy duýmagyna kömek edýär.
Mundan başga-da, LED yşyklandyryşyny: tormoz tutulan wagtynda reňk üýtgemelerini, öwrülme signallaryny we beýleki wizual alamatlary ulanmak göz öňünde tutulýar. Ulgamyň işlemegi üçin salonyň ýelejirediş we yşyklandyryş ýaly öňden bar bolan bölekleri ulanylýar.
