Mercedes-AMG kompaniýasy üç sany aksial elektrik hereketlendirijisi bolan we 1169 at güýjüni berýän täze elektrik AMG GT 4-Door Coupe sport sedanyny hödürledi diýip, «The Verge» neşiri habar berýär.
Bu model Mercedes kompaniýasyna degişli bolan Beýik Britaniýanyň YASA kompaniýasynyň elektrik hereketlendirijileri bilen üpjün edildi. Oklaýyn (aksial) hereketlendirijiler özüniň ykjamlygy we ýokary udel kuwwatlylygy bilen tapawutlanýar, bu bolsa güýç gurluşynyň umumy agramyny azaltmaga mümkinçilik berdi. Awtomobiliň iň ýokary aýlaw pursaty, takmynan, 2000 N·m barabar. Ulagyň tizligini sagatda 100 kilometre ýetirmegi bary-ýogy 2,1 sekunt, 200 kilometre ýetirmegi bolsa 6,8 sekunt wagt alýar.
Elektromobil diametri, takmynan, 2,5 santimetr bolan örän inçe silindr şekilli öýjükleri bolan täze batareýa bilen enjamlaşdyryldy. Ony sowatmak üçin tok geçirmeýän ýagyň iýmit çeşmesiniň elementleriniň daşyndan aýlanma ulgamy ulanylýar. Öndürijiniň berýän maglumatyna görä, sowadyş ulgamynyň netijeliligi Mercedes EQS modeliniň batareýasy bilen deňeşdirilende, takmynan, dört esse ýokarydyr.
Awtomobil 800 woltlyk platformada guruldy we 600 kWt çenli kuwwatly zarýad berşi goldaýar. Kompaniýanyň mälim etmegine görä, hatda yzygiderli güýçli tizlenmelerden soň hem batareýa durnukly temperaturany saklamagy başarýar.
Bu model giň tigir arkalary we pes silueti bilen özüne mahsus bolan AMG stilini saklap galdy. Salonda sport oturgyçlary, sanly enjam paneli we alkantara derisinden taýýarlanan bezegler ýerleşdirildi. Şeýle hem içinden ýandyrylýan hereketlendirijileriň sesine emeli usulda öýkünýän ulgam we reňkini üýtgetmäge ukyply bolan üýtgeşik Sky Control panoramik üçegi göz öňünde tutuldy.
Ulagyň bir zarýad bilen geçip biljek ýoly GT 63 görnüşinde 696 kilometre çenli we GT 55 görnüşinde bolsa 700 kilometre çenli ýetýär. Önümçiligi Germaniýanyň Sindelfingen şäherinde ýola goýmak meýilleşdirilýär, ilkinji awtomobilleriň 2027-nji ýylda alyjylara gowuşmagyna garaşylýar.
