Läle Şöhradowa üç ýyldan soň Türkmenistanyň küşt täjini gaýtaryp aldy

Aşgabatda on günüň dowamynda geçirilen Türkmenistanyň çempionatynyň Ýokary ligasynyň zenanlar toparynda FIDE-niň ussady, 20 ýaşly Läle Şöhradowa uly ýeňiş gazanyp, üç ýyldan soň ýurduň küşt täjini özüne gaýtaryp aldy. Ýagşygeldi Kakaýew adyndaky Halkara nebit we gaz uniwersitetiniň talyby bolan Läle mümkin bolan 14 döwde 11,5 utuk toplap, iň ýokary netijäni görkezdi we ikinji orny eýelän Jahan Rejepowadan 3,5 utuk öňe saýlandy. Baýrakly üçlügi bolsa 7,5 utuk bilen 16 ýaşly Mähri Agamyradowa jemledi.
Läle Şöhradowanyň sport ýoly üstünliklere baýdyr. Ol eýýäm 9 ýaşynda öz ýaşyndaky mekdep okuwçylarynyň arasynda dünýä çempiony bolmagy başaran bolsa, 12 ýaşynda Bütindünýä küşt olimpiadasynda ilkinji gezek çykyş etdi. 2022-nji ýylyň noýabrynda Läle rapid boýunça Türkmenistanyň çempiony boldy, 2023-nji ýylyň fewralynda bolsa zenanlaryň arasynda nusgawy küşt boýunça ilkinji gezek bu ada mynasyp boldy. Indi ol Türkmenistanyň iki gezek çempiony boldy.
Bu çempionatyň netijeleri boýunça baýrakly orunlary eýelän küştçüler, şeýle hem Ogulsuraý Baýrambaýewa we Leýla Şöhradowa Türkmenistanyň zenanlar ýygyndysynyň düzümine girmäge hukuk gazandy. Türkmenistanyň zenanlar ýygyndy topary şu ýylyň sentýabr aýynda Samarkantda (Özbegistan) geçiriljek 46-njy Bütindünýä küşt olimpiadasynda ýurduň sport abraýyny gorar.