26 ýaşly britan aýdymçysy Oliwiýa Din 2026-njy ýylyň Brit Awards baýragynyň gowşurylyş dabarasynda esasy ýeňiji boldy. Bu ýyl dabara ilkinji gezek Londonda däl-de, Mançesterdäki Co-op Live arenasynda geçirildi. Aýdymçy zenan dalaşgär görkezilen ähli ugurlarynda, ýagny dört nominasiýada baýrak aldy.
Din "Ýylyň artisti" we "Iň gowy pop ýerine ýetirji" diýlip ykrar edildi. Onuň The Art of Loving albomy "Ýylyň albomy" baýragyna mynasyp boldy, Sem Fender bilen bilelikde ýerine ýetiren Rein Me In dueti bolsa "Ýylyň aýdymy" diýlip atlandyryldy.
"Bu albom häzirki yşky-muhabbetden mahrum görünýän dünýäde yşk hem ysnyşyk duýgularyna bagyşlanan" diýip, aýdymçy albom üçin baýragy kabul edip durka aýtdy.
Dabaradaky beýleki ýeňijileriň arasynda Wolf Alice (“Ýylyň topary”), Deýw (“Hip-hop/rep”) we Lola Ýang (“Ýylyň öňdebaryjysy”) bar. Rozaliýa we Nýu-Ýorkly Geese indi-rok topary halkara baýraklaryna mynasyp boldular. PinkPantheress bu baýragy gazanan ilkinji zenan prodýuser boldy.
Mark Ronson ajaýyp goşandy üçin, Noel Gallaher bolsa aýdymlaryň awtorylygy üçin aýratyn sylaglandy (ol öz minnetdarlyk sözünde dogany Liamy we Oasis toparyny hem ýatlap geçdi). Şeron Osborn merhum adamsy Ozzi Osbornyň adyna bütin ömrüne gazanan üstünligi üçin berlen baýragy kabul etdi. Agşam Robbi Wilýamsyň ýerine ýetirmeginde Ozziniň "No More Tears" hit aýdymynyň ýaňlanmagy bilen tamamlandy.
