OpenAI kompaniýasy ChatGPT-ni her hepdede işjeň ulanýanlarynyň sanynyň 900 million adama ýetendigini habar berdi. Şeýlelikde, bu hyzmat 1 milliard ulanyjy çägine has-da golaýlady.
Şol bir wagtyň özünde, tölegli abunaçylaryň sany 50 milliona çenli ýokarlandy.
"Ýylyň başynda abunaçylaryň goşulma depgini ep-esli çaltlandy: çaklamalara görä, ýanwar we fewral aýlary biziň taryhymyzda täze abunaçylaryň sany boýunça iň uly aýlar bolar. Adamlar ChatGPT-ni öwrenmek, tekst ýazmak, meýilleşdirme we döredijilik üçin ulanýarlar. Ulanyş gerimi giňeldigiçe, önüm ulanyjylaryň dessine duýup biljek görnüşinde kämilleşýär: has çalt jogaplar, ýokary takyklyk, güýçlendirilen howpsuzlyk we has durnukly iş akymy," — diýlip OpenAI-yň habarynda bellenilýär.
Kompaniýanyň maglumatlaryna görä, OpenAI-yň her hepdede 800 million işjeň ulanyjy barada hasabat beren 2025-nji ýylyň oktýabr aýyndan bäri, ChatGPT-niň diňleýjiler köpçüligi 100 million adam artdy.
Täze görkezijiler 110 milliard dollar möçberindäki hususy maýa goýumlaryny çekmek baradaky yglan edilmeginiň çäginde mälim edildi. Bu tapgyr hususy maliýeleşdirme taryhyndaky iň uly maýa goýumlaryň biri boldy. Maýadarlaryň arasynda degişlilikde 50, 30 we 30 milliard dollar maýa goýan Amazon, Nvidia we SoftBank bar. Maýa goýumlary alynmazdan ozal OpenAI-yň gymmaty 730 milliard dollar möçberinde bahalandyrylypdy. Maýa goýum tapgyry häzirki wagtda hem açyk bolmagynda galýar.
