Tehnologiýa kompaniýasy Block emeli aň guralynyň işjeň ornaşdyrylmagy bilen baglylykda işgärleriniň takmynan ýarysyny işden boşadar. Bu barada kompaniýanyň ýolbaşçysy, Twitter-i esaslandyryjy Jek Dorsi X sosial ulgamynda habar berdi.
Onuň sözlerine görä, bu kararyň maliýe kynçylyklaryna degişli ýeri ýok. Dorsiniň sözlerinden çen tutsaň, işiň girdejisi we müşderileriň sany barha artmak bilen. Ol emeli aň ulanmagyň bähbitli tarapyny kompaniýanyň gurmak we dolandyrmak düşünjesini düýpli üýtgedýän täze iş usulyny açýandygynda görýär.
Iş orunlarynyň kemeldilmegi Block-yň işgär sanyny 10 müňden 6 müňe çenli azaldar.
«Men geljek ýyldan başga-da köp kompaniýalaryň şeýle netijä gelip, gurluşlaryny şu kybap üýtgetjekdiklerine ynanýaryn» diýip, Dorsi öz teswirinde ýazýar.
2024-nji ýyldan bäri Block eýýäm birnäçe gezek işgär azaltmak çäresini geçirdi, ýöne munuň emeli aňyň ornaşdyrylmagy sebäplidigini gönümel aýtmagy ilkinji gezekdir. Bu karar tehnologiýa pudagyndaky hünärmenleriň işden çykarylmagyna agramly esas boldy. Mundan ozal Amazon, Meta, Microsoft we Google işgärleriň azaldyljakdygy barada habar beripdiler. Hatda, Meta-ny esaslandyryjy Mark Sukerberg «2026-njy ýyl emeli aňyň iş usulymyzy düýpli üýtgedýän ýyly bolar» diýip, öz beýanatynda-da aýdybam geçipdi.
