Xiaomi kompaniýasy yzlygyna zarýad beriş tehnologiýasy üçin niýetlenen, bary-ýogy 1,5 dollardan satylýan gysga we akylly USB-C kabelini hödürledi.
Bu täze önümiň uzynlygy bary-ýogy 16 sm. Ol yzlygyna zarýad berýän wagty iki smartfony birleşdirmek üçin ýörite gysga edildi. Bu ulanyjy üçin hem örän oňaýlydyr.
Täsin tarapy, şeýle keltejik geçiriji 120 Wt çenli kuwwaty özünde saklaýar. Bu görkeziji häzirki zaman smartfonlarynyň yzlygyna zarýadyň üsti bilen berip biljek güýjünden has ýokary. Ony adaty zarýad beriji bloklar bilen hem arkaýyn ulanyp bolýar.
Kabeliň daşynyň örme mata bilen daşlanmagy onuň çydamlylygyny artdyrýar. Içindäki akylly çip bolsa birikdirilen gurluşy awtomat tanap, oňa iň amatly we howpsuz energiýa akymyny sazlaýar. Bu tehnologiýa batareýanyň gyzmagynyň öňüni alýar we zarýad beriş pursadyny doly gözegçilikde saklaýar.
