Apple kompaniýasy Ýewropanyň invrs.io startapyny satyn aldy. Bu geleşigiň iň gyzykly tarapy — startapda ýekeje adam işleýär, olam onuň esaslandyryjysy Martin Şubert. Indi ol öz işini Apple-de dowam etdirýär.
Bu şertnama üçin amerikan kompaniýasynyň näçe pul çykarany mälim edilmedi.
Maglumatlara görä, Şubert öz startapyny 2023-nji ýylda esaslandyrypdyr. Kompaniýa emeli aňy ulanmak arkaly fotonika barlaglary we optika üçin açyk freýmworklary (programma üpjünçilik binýatlaryny) işläp düzýär.
Hünärmenler Apple kompaniýasy invrs.io startapynyň fotonika we optika pudagyndaky ylmy açyşlaryny diňe bir Vision Pro-da däl, eýsem geljekde çykaryljak beýleki VR we AR funksiýaly enjamlarynda hem giňden ulanyp biler diýip çaklaýar.
Öz kompaniýasyny esaslandyrmazdan ozal, Şubert Meta korporasiýasynda ylmy işgär bolup zähmet çekdi, şeýle-de Google we Micron-da ekranlaryň öňdebaryjy tehnologiýalaryny işläp düzmek bilen meşgullandy.
