Halkara futbol federasiýasy (FIFA) ýaş oýunçylaryň ukyplaryny durmuşa geçirmek üçin 100 ýurtda ýöriteleşdirilen akademiýalary açmagy maksat edinýär. Bu barada FIFA-nyň dünýä futbolyny ösdürmek bölüminiň ýolbaşçysy Arsen Wenger mälim etdi.
Hünärmeniň aýtmagyna görä, häzirki wagtda şeýle merkezleriň 60-sy dürli döwletlerde hereket edýär. Bu başlangyjyň esasy wezipesi bütin dünýädäki çagalara bilim almakda deň mümkinçilikleri döretmekden ybaratdyr.
«Biziň maksadymyz — 100 ýurtda 100 sany FIFA akademiýasyny açmak. Soňky 10 ýylyň dowamynda Ýewropadan yza galýan ýurtlaryň mümkinçiliklerini ösdürmek üçin köp işler edildi. Bu ýurtlarda uly ösüş gazanyldy, derejeler kem-kemden deňleşýär we futbolyň bütin dünýäde hili has ýokarlandy» diýip, Arsen Wenger belledi.
Ol bu taslamanyň diňe bir okatmagy däl, eýsem bäsleşikleri gurnamagy hem göz öňünde tutýandygyny aýtdy. Muňa her ýyl geçirilýän 17 ýaşyna çenli (U17) dünýä çempionaty we 15 ýaşyna çenli çagalar üçin saýlama tapgyrsyz geçiriljek festiwal degişlidir.
«Biz ýurtlaryň içinde işleýäris, zehinleri ýüze çykarýarys, olary okadýarys we ýaryşlarda çykyş etmäge mümkinçilik döredýäris. Häzir her ýyl 17 ýaşa çenlileriň arasynda FIFA Dünýä çempionaty geçirilýär, biz bolsa 15 ýaşyna çenli ýaşlar üçin ähli ýurtlaryň gatnaşmagynda festiwal döretmek isleýäris. Bu ýerde saýlama tapgyrlar bolmaz, çagalara dünýä derejesinde oýnamaga pursat berler, şunda ýaryşa jemi 211 ýurduň hemmesi gatnaşar» diýip, Wenger sözüniň üstüni ýetirdi.
