Britaniýanyň meşhur sport awtoulaglaryny öndürijisi Aston Martin çykdajylary tygşytlamak maksady bilen işgärleriniň sanyny 20%-e çenli azaltmagy meýilleşdirýändigini yglan etdi. Häzirki wagtda kompaniýada takmynan 3000 adam zähmet çekýär.
2025-nji ýylyň maliýe netijelerine görä, Aston Martin-iň arassa zyýany 363,9 million funt sterlinge (491,5 million dollar) ýetdi. Bir ýyl mundan ozal bu görkeziji 289,1 million funt sterlinge (390,3 million dollar) deňdi. Kompaniýa maliýe ýagdaýynyň peselmesini awtoulaglara bolan islegiň azalmagy, şeýle hem ABŞ-nyň Prezidenti Donald Tramp tarapyndan girizilen täze import gümrük paçlarynyň oňaýsyz täsiri bilen düşündirýär.
Öndüriji bu çäklendirmeler arkaly 40 million funt sterlinge (54 million dollar) çenli serişde tygşytlamagy maksat edinýär. Işgärleriň sanyny azaltmagyň anyk möhletleri mälim edilmedi, emma kompaniýa "esasy üýtgeşmeleriň şu ýylyň dowamynda" amala aşyryljakdygyny belledi.
Mundan ozal, geçen ýylyň başynda Aston Martin eýýäm 170 sany iş ornuny azaldypdy. Ýyllyk hasabat we işgärleriň sanynyň kemeltjekdigi baradaky habarlar çap edilenden soň, kompaniýanyň paýnamalarynyň bahasy 2% peseldi.
