Älemde mälim bolan iň äpet ýyldyzlaryň biri — WOH G64 — düýpli üýtgeşmelere sezewar boldy. Alymlaryň pikirine görä, bu ýyldyzyň ömri tamamlanyp barýar. Afiny milli obserwatoriýasynyň hünärmeni Gonsalo Munýosa-Sançesiň ýolbaşçylygyndaky barlag topary şeýle netijä geldi. Ylmy işiň netijeleri Nature Astronomy žurnalynda çap edildi.
Alymlaryň berýän maglumatlaryna görä, 2014-nji ýylda WOH G64 ýyldyzy gyzyl supergigant tapgyryndan seýrek duş gelýän sary gipergigant fazasyna geçdi. Bu bolsa ýyldyzyň öz daşky gatlaklaryny işjeň ýagdaýda ýitirip, gysylyp we gyzyp başlandygynyň alamatydyr. Şeýle hadysalar diňe äpet ýyldyzlaryň ewolýusiýasynyň iň soňky tapgyrlaryna mahsusdyr.
WOH G64 ýyldyzy Uly Magellan Buludynda ýerleşýär we ol 1970-nji ýyllarda açyldy. Onuň radiusy Günden takmynan 1500 esse uly, emma ýaşy 5 million ýyldan hem az diýlip çaklanylýar. 2024-nji ýylda ol Akmaýanyň ýolundan daşarda ýerleşip, Örän Uly Teleskopyň (VLT) interferometri arkaly jikme-jik surata düşürilen ilkinji ýyldyz boldy. Şol suratlarda ýyldyzyň öz massasyny ýitirendigini tassyklaýan dykyz tozan pillesi aýdyň ýüze çykaryldy.
Alymlar bu üýtgeşmeleriň ýyldyzyň goňşy ýyldyz bilen özara täsirleşmegi ýa-da geljekki äpet täze ýyldyz (supernowa) partlamasyna taýýarlygy bolmagynyň mümkindigini belleýärler. Partlamanyň anyk haçan boljakdygy belli däl, emma muňa şaýat bolmak diňe bir ajaýyp galaktikaara tomaşa bolmak bilen çäklenmän, eýsem ylym dünýäsi üçin iň uly açyşlaryň biri bolar.
