Metropoliten-muzeýi Met Gala 2026 haýyr-sahawat balynyň mowzugynyň «Moda — bu sungat» diýlip atlandyrylýandygyny resmi taýdan yglan etdi. Vogue neşiriniň habar bermegine görä, çäre 4-nji maýda Nýu-Ýorkdaky (ABŞ) Condé Nast Galleries giňişliginde geçiriler.
Balyň temasy «Costume Art» sergisi bilen gönüden-göni baglanyşyklydyr. Bu sergi suratlar, heýkeller we beýleki sungat eserleri bilen bir hatarda modany hem öwrenýär.
Nýu-Ýorkuň Metropoliten-muzeýiniň habarynda: «Balyň dress-kody (geýiniş düzgüni) myhmanlara modany sungatyň janly görnüşi hökmünde kabul etmegi we bu sungatyň tutuş taryhynyň dowamynda geýinmek arkaly bedeniň san-sajaksyz şekillere eýe bolşuny dabaralandyrmagy hödürleýär» diýlip aýdylýar.
Kostýum institutynyň kuratory Endrýu Bolton bu taslamanyň dürli döwürlerde eşigiň beden we durmuş derejesi baradaky düşünjeleri kemala getirişini derňeýändigini belledi. Meýdançasy birnäçe tematik bölümlere, şol sanda beden baradaky nusgawy düşünjeler, «göze görünmeýän» şekiller we anatomiýa ýaly bölümlere bölünen sergi, muzeýiň kolleksiýasyndan alnan taryhy lybaslary we sungat eserlerini birleşdirer.
Bal agşamynyň esasy oturdaşlary hökmünde pop-ýyldyz Beýonse, «Oskar» baýragynyň eýesi, aktrisa Nikol Kidman, meşhur tennisçi Winus Wilýams we Vogue žurnalynyň redaktory Anna Wintur çykyş ederler.
Met Gala Nýu-Ýorkdaky Kostýum institutyny goldamak üçin haýyr-sahawat agşamy hökmünde geçirilýär we her ýyl muzeýiň täze moda ekspozisiýasyny açýar. Bu bal ilkinji gezek 1948-nji ýylda geçirilipdi.
