Nestlé doňdurma bilen bagly önümçilikden sowaşdy

Şweýsariýanyň Nestlé kompaniýasy özüniň galan doňdurma önümçilik biznesini satmak we bu ugurdaky işlerini adaty usulda bes etmek niýetini mälim etdi. Bu karar korporasiýanyň global derejedäki gurluşyny üýtgetmek meýilnamasynyň bir bölegidir.
Häzirki wagtda Nestlé-niň ýolbaşçy düzümi Beýik Britaniýanyň Froneri kompaniýasy bilen gepleşikleriň soňky tapgyrlaryny alyp barýar. Froneri — Nestlé-niň we PAI Partners maýa goýum toparynyň bilelikdäki kärhanasydyr. Froneri eýýäm häzirki wagtda Nestlé degişli bolan birnäçe doňdurma brendlerini, şol sanda Häagen-Dazs we Drumstick ýaly meşhur markalary dolandyrýar.
Çeşmeleriň çaklamasyna görä, boljak şertnamanyň bahasy takmynan 1 mlrd şweýsar frankyna (1,3 mlrd ABŞ dollaryna) deňdir. Aktiwleri Froneri kompaniýasyna geçirmek işiniň geljek ýylyň dowamynda tamamlanmagyna garaşylýar.
Nestlé has köp girdeji getirýän we strategik taýdan ähmiýetli ugurlara üns bermegi meýilleşdirýär. Bulara kofe, dürli iýmit önümleri, öý haýwanlary üçin harytlar we tiz taýýarlanýan tagamlar degişlidir.
Doňdurma önümçiliginden ýüz öwrülmeginiň ýene bir sebäbi — bu pudagyň özboluşly kynçylyklarydyr. Hususan-da, satuwlaryň möwsümleýin häsiýeti hem-de doňdurylan önümleri saklamak we daşamak bilen bagly kynçylyklar bu karara gelinmegine esas boldy.