«Ýene bir gezek oýlan!»: Formula-1 täze möwsümiň öňüsyrasynda mahabat wideosyny görkezdi

Formula-1-iň täze möwsümi 6-njy martda Melburndaky ýaryş bilen açylar. Möwsümiň başlangyjy üçin çempionat tarapyndan aktýor Damson Idris we dünýä çempionatynyň ähli 22 pilotynyň gatnaşmagynda «All To Drive For» atly mahabat kampaniýasy başlandy.
Idris geçen ýyl prokatda uly meşhurlyk gazanan «F1» filminde baş rollaryň birini ýerine ýetiripdi. Täze 60 sekuntlyk wideo onuň: «Siz Formula-1-i bilýändirin öýdýärsiňizmi?» diýen soragy bilen başlanýar. Ol janköýerlere «ýene bir gezek oýlanmagy» maslahat berýär. Soňra bolsa oňa häzirki dünýä çempiony Lando Norris goşulýar. «Ähli zat üýtgeýär» diýip, McLaren toparynyň sürüjisi belleýär. Ondan soňra beýleki ýaryşa gatnaşyjylar bu pikiri dowam etdirýärler.
Sanly mahabat kampaniýasyndan başga-da, çempionatyň ýolbaşçylary London, Nýu-Ýork, Los-Anjeles we Melburn şäherlerinde: «Täze awtomobiller, täze güýç, täze toparlar, täze hyjuw — ähli zat ýeňiş üçin» diýen şygarly tagtalary hem ýerleşdirdiler.
Formula-1-iň täjirçilik direktory Emili Prazer: «2026-njy ýylyň möwsümi täze awtomobiller, täze motorlar we dolandyrmagyň düýbünden başga  görnüşi bilen Formula-1 ýaryşlarynyň täze neslini garşylaýar. Bu biziň sportumyzyň taryhyndaky iň uly özgeriş. Şertler deňleşdirilýär we her bir topar iň gowy awtomobili döretmek hem-de iň ýokary netijäni gazanmak ugrunda göreşýär. Kampaniýa köne hem täze janköýerleri her bir aýlawynyň netijesi näbelli bolan we hemme zadyň ýeňiş ugrundaky göreşde çözülýän ýaryşyna gatnaşmaga çagyrýar» diýip, ýaryşyň täzelikleri hakynda joşgunly beýan etdi.