Indoneziýanyň Bali adasynda güýçli ýagyn sebäpli howanyň iň ýokary — «gyzyl» howp derejesi yglan edildi. Ýagyş eýýäm suw joşgunlaryna we süýşgünlere sebäp boldy diýip, Jakarta Globe neşiri Bali prowinsiýasynyň Meteorologiýa, klimatologiýa we geofizika agentligine salgylanyp habar berýär.
Meteogullugyň berýän maglumatyna görä, 24-nji fewraldan 26-njy fewrala çenli adada orta we güýçli derejeli yzygiderli ýagyşlara garaşylýar. Denpasar, Badung, Buleleng, Karangasem, Klungkung we Gianýar ýaly kenarýaka sebitlerde şemalyň tizliginiň sagatda 45 kilometrden geçmegi ähtimal. Adanyň günorta suwlarynda tolkunlaryň beýikligi şu gün 4 metre çenli ýeter, çarşenbe güni bolsa 3 metre çenli peseler.
Meşhur syýahatçylyk zolaklary bolan Nusa-Dua, Kuta, Tanah-Lot, Sanur, Ubud, Bedugul, Kintamani we Besakih ýaly ýerlerde 25-nji fewralda ýagyşly howa, gije bolsa ýyldyrym çakmagyna we gök gürlemegine garaşylýar.
Häkimiýetler ýerli ýaşaýjylara, syýahatçylara we deňiz gämileriniň operatorlaryna suw basan çäklerden uzakda bolmagy hem-de resmi howa maglumatlaryndan yzygider habarly bolup durmagy maslahat berýärler. Ýakyn günlerde-de güýçli ýagyşlaryň we şemalyň dowam etmek töwekgelçiliginiň saklanýandygy hem duýdurylýar.
