5-nji ýanwarda irden Indoneziýadaky Siau adasynda güýçli suw joşgunyna sebäp bolan çabga başlady. Demirgazyk Sulawesidäki tebigy betbagtçylygyň azyndan 14 adam pidasy boldy, ýene dördüsi dereksiz ýiten diýlip hasaplanýar. Bu barada Tebigy betbagtçylyklaryň netijelerini gowşatmak boýunça milli agentlige salgylanyp, Reuters habar berýär.
Suwuň derejesi ýokarlanandan soň, häkimiýet 400-den gowrak adamy ýerli mekdeplere we ybadathanalara ewakuasiýa etdi. Ýitenleri gözlemek üçin meýletinçileriň hem gatnaşmagynda halas ediş işi ýola goýuldy.
Sebitiň gubernatory Ýulius Selwanus tebigy betbagtçylygyň ýüzlerçe ýaşaýyş jaýlaryny we administratiw binalary weýran edendigini habar berdi.
Bellenilişi ýaly, zyýan çeken sebitlerde esasy ýollar daşlardan, zibilden we palçykdan doldy. Ýollary arassalamak üçin ýörite tehnika işe çekildi.
Indoneziýanyň Meteorologiýa agentliginiň çaklamalaryna görä, ýanwarda we fewralda Ýawa, Sulawesi, Maluku we Papua adalarynda suw joşgunynyň ýokary ähtimallygy saklanýar. Sumatrada we Borneoda ygalyň iň ýokary derejesi geçen ýylyň ahyrynda hasaba alyndy. Hususan-da, noýabrda Sumatradaky siklonyň pidasy müňden gowrak adam boldy, ýene ýüzlerçesi häzirem dereksiz ýiten diýlip hasaplanýar.
