Salwadoryň Sakamil etrabynda 100 müňden gowrak plastik gapakdan taýýarlanan ägirt uly diwar suraty peýda boldy. Bu işiň beýikligi 13 metrden geçýär. Euronews agentliginiň habar bermegine görä, awtor dünýäde bu ululykda gapak bilen «çekilen» başga bir freskanyň ýokdugyny aýdýar.
Taslamanyň awtory — 28 ýaşly wenesuelaly suratkeş Oskar Oliwares. Ol eýýäm birnäçe ýyldan bäri gaýtadan işlenilen galyndylardan köçe sungatynyň eserlerini döredip gelýär. Bu täze iş onuň döredijilik ýolundaky iň uly taslama boldy.
Portretiň merkezinde Leonardo da Winçiniň «Mona Lizasyna» çalymdaş salwadorly zenanyň keşbi durýar. Zenan garaýagyz, buýra saçly görnüşde şekillendirilip, onuň saçlary milli baýdagyň reňklerinde ýerine ýetirildi. Suratkeş onuň anyk bir adamyň däl-de, ýurduň adaty raýatynyň simwoliki şekilidigini aýdýar.
Freska üçin plastik gapaklary Oliwaresiň goňşulary, dostlary we galyndylary gaýtadan işleýän kärhanalar ýygnap berdiler. Iş amala aşyrylanda plastik gapaklara hiç hili boýag goşulmandyr, olar diňe öz reňklerinde ulanylypdyr.
Suratkeşiň pikiriçe, taslamanyň ähmiýeti diňe sungat bilen çäklenmeýär.
«Bu işde iň möhüm zat, gaýtadan ulanan gapaklarymyzyň sany däl, eýsem onuň her bir tomaşaça we gapak ýygnan her bir adama ýetirýän täsiridir. Çünki bu adamlara, hojalyklara we jemgyýete plastik galyndylaryna düýbünden başgaça göz bilen garamaga mümkinçilik berýär» diýip, Oliwares muny özüçe düşündirýär.
Oliwaresiň maksady, şuňa meňzeş freskalar arkaly Sakamil etrabyny açyk asman astyndaky muzeýe öwrüp, ony şäher sungatynyň täze merkezi etmekdir.
