Ýumşak orangutan oýunjagyny özüne «eje» edinen Panç atly makakajygyň meşhurlygy IKEA-nyň bu oýunjaklaryna bolan islegi rekord derejä ýetirdi.
Panç özüniň gynançly hekaýasy bilen dünýä belli boldy. Makaka maýmynjygynyň çagasy Tokionyň golaýyndaky Itikawa haýwanat bagynda 2025-nji ýylyň iýulynda dünýä inenden soň, öz enesi tarapyndan ret edildi. Haýwanat bagynyň işgärleri ýalňyz galan maýmynjyga nebsi agyryp, oňa «ene» hökmünde IKEA-nyň mämişi reňkli ýumşak orangutan oýunjagyny berdiler.
Ene mährine zar bolan maýmynjyk bu oýunjakdan teselli tapdy. Pançyň ony uzakly gün ýanyndan aýyrman, her ýerde gujaklap göterip ýörşi internet ulanyjylarynyň ünsüni çekdi. Bu oýunjak ýalňyzlygy ýeňip geçmegiň simwolyna öwrüldi.
Indi, The Washington Post neşiriniň habar bermegine görä, bu wakanyň täsiri bilen Ýaponiýada, ABŞ-da we Günorta Koreýada orangutan oýunjaklary eýýäm doly satylyp gutaryldy.
IKEA bu ýagdaýy mahabat mümkinçiligi hökmünde ulanmaga başlady we oýunjagy indi «Pançyň orangutany» diýen at bilen hödürleýär.
Kompaniýasy oýunjagyň ýetmezçiligine mümkin boldugyça sabyrlylyk bilen çemeleşmegi haýyş etdi we mämişi reňkli orangutanlaryň tiz wagtda täzeden tekjelere gaýdyp geljekdigini wada berdi.
Kompaniýanyň wekilleri Hawýer Kinýones we Karin Blind Pedersen hem bu ýagdaý hakda öz pikirlerini paýlaşdylar. Olar arzyly oýunjagyň öňden bäri hem dürli bazarlarda iň köp isleg bildirilýän önümleriniň biridigini, Ýaponiýadaky bu wakanyň bolsa oňa bolan hyrydarlygy has-da güýçlendirendigini bellediler. Şeýle hem olar öz öndüren ýumşak orangutanlarynyň Pança mähir we rahatlyk berýändigine diýseň tolgunýandyklaryny-da aýtdylar.
