Ubisoft kompaniýasynyň ýolbaşçysy Iw Giýmo, kompaniýanyň «Far Cry» seriýasyndan iki sany täze oýun çykarmaga taýýarlanýandygyny tassyklady. Ol bu barada «Variety» neşirine beren interwýusynda mälim etdi. Bu söhbetdeşlik kompaniýanyň giň gerimli gaýtadan guralyşyndan soňky ilkinji uly jemgyýetçilik çykyşy boldy.
Söhbetdeşligiň dowamynda Giýmo Ubisoft-yň iň esasy franşizalary bolan «Assassin’s Creed» we «Far Cry» barada durup geçdi. Onuň aýtmagyna görä, bu seriýalaryň işläp düzüjiler toparlarynyň «Vantage Studios» diýlip atlandyrylýan ýeke-täk «döredijilik öýünde» birleşdirilmegi, serişdeleri beýleki goşmaça taslamalara sarp etmezden, hut şu brendleri ösdürmäge gönükdirmäge mümkinçilik berer.
Şeýle hem ol häzirki wagtda birnäçe «Assassin’s Creed» oýunlarynyň işlenip düzülýändigini belledi. Olaryň arasynda diňe bir sýužetli we ýeke adamlyk taslamalar däl, eýsem köp ulanyjyly (multiplayer) we bilelikde oýnamaga (co-op) niýetlenen "serwis" görnüşli oýunlar hem bar.
«Far Cry» barada aýdylanda bolsa, Giýmo anyk jikme-jiklikleri aýan etmezden, seriýanyň iki sany täze oýnunyň ýakynda çykjakdygyny resmi taýdan tassyklady we bu taslamalaryň "uly geljegi bar" diýip atlandyrdy. Mundan ozal ol franşizanyň onlaýn bölegini güýçlendirmegiň zerurdygyny aýdypdy.
Ubisoft-yň ýolbaşçysy interwýusynda ýene-de bäş ýylyň dowamynda kompaniýanyň öz esasy seriýalaryny ösdürmäge üns berjekdigini habar berdi. Aýratyn hem, fiziki mümkinçiligi çäkli adamlaryň wirtual dünýäler bilen amatly aragatnaşyk saklap bilmekleri üçin oýunlaryň elýeterliligine uly ähmiýet bermek meýilleşdirilýär.
