Ýaponiýanyň Ulag ministrligi awiakompaniýalara uçaryň içinde portatiw zarýad beriji enjamlary ulanmagy gadagan edýär. Bu görkezme 2026-njy ýylyň aprel aýynda güýje girer.
Gadaganlyga uçuş wagtynda smartfonlaryň akkumulýatorlarynyň we pauerbanklaryň ýanmagy bilen bagly ýüze çykan wakalar sebäp boldy.
Buýruk güýje girenden soň, ýolagçylar uçaryň salonynda daşky akkumulýatorlaryň kömegi bilen telefonlaryna zarýad berip bilmezler. Şol bir wagtyň özünde, el goşlarynda şeýle enjamlaryň iki sanysyna çenli almaga rugsat berilýär. Ýöne olary-da uçuş wagtynda zarýad bermek üçin ulanmak düýpli gadagandyr. Hatda ol enjamlary oturgyçlaryň ýokarsyndaky goş goýulýan bölümlerde saklamaga hem rugsat berilmeýär.
Ätiýaçlyk çäreleri hakyky bolup geçen wakalar bilen baglydyr. Çünki zarýad beriji enjamlar zeper ýetmek, öndürilişindäki kemçilikler ýa-da aşa gyzmak sebäpli ot alyp bilýärler. Bu çäräni ilkinji bolup, geçen ýylyň ýanwar aýynda näsaz enjam sebäpli ýüze çykan ýangyndan soň Günorta Koreýanyň Air Busan awiakompaniýasy girizipdi. Edil şonuň ýaly, beýleki Aziýa we Ýewropa awiakompaniýalary hem şoňa meňzeş çäklendirmeleri kabul etdiler.
