NASA-nyň Perseverance roweri taryhda ilkinji gezek Gyzyl planetada özüniň takyk çelgisini özbaşdak kesgitlemek mümkinçiligine eýe boldy.
Öňler rower diňe tigirleriniň aýlanyşyna we töweregiň wizual seljermesine bil baglap, 30 metre ýetýän derejede ýalňyşlyk goýberýärdi. Bu ýagdaý onuň planetanyň nätekiz ýerlerinde hereket etmegini kynlaşdyrýardy.
Indi roweriň bortunda Mars Global Localization ulgamy işleýär. Bu täze algoritm marsohodyň nawigasiýa kameralaryndan alnan panorama suratlary Marsyň orbitasyndan alnan relýef kartalary bilen deňeşdirýär. Ähli hasaplamalar göni roweriň Snapdragon 801 prosessorynda amala aşyrylýar. Takmynan 2 minuda çekýän bu amal koordinatalary 25 sm takyklyk bilen kesgitlemäge mümkinçilik berýär.
Öňler hasaplamadaky ýalňyşlyklary düzetmek üçin Ýerdäki hünärmenler hemranyň suratlaryny marsohodyň panoramalary bilen elde deňeşdirýärdiler. Bu iş käte 1-2 güne çekýärdi we şol aralykda rower ýerinden butnaman durmaly bolýardy. Indi ol has uzyn aralyklary-da özbaşdak geçip bilýär we onuň bökdençliklerden sowmaga niýetlenen AutoNav ulgamy hem öňkä görä has takyk işleýär.
Öňki 264 duralganyň maglumatlarynda barlanylan algoritm 100% takyklyk görkezdi. 2 we 16-njy fewralda bu ulgam ilkinji gezek Marsda, Ýezero krateriniň Mala Mala meýdançasynda iş ýüzünde ulanyldy.
Takyk nawigasiýa we emeli aňyň utgaşykly hereket etmegi roweriň Gyzyl planetany öwrenmek mümkinçiliklerini has-da giňeldýär.
