Google kompaniýasy Chrome brauzeriniň desktop görnüşiniň öndürijiligini ýokarlandyrmak üçin üç sany täze guralyň goşulýandygyny habar berdi. Olar ekrany bölmek režiminden, PDF faýllaryna bellikleri goşmak we olary göni bulut saklaýjysyna ýüklemek mümkinçiliklerinden ybaratdyr.
Ekrany bölmek guraly bir penjirede bir wagtda iki sany sahypany görkezmäge mümkinçilik berýär. Bu režimi işjeňleşdirmek üçin islendik salgylanmanyň üstüne syçanjygyň sag düwmesi bilen basyp, degişli menýuny ulanmaly. Iki panelli interfeýs panelleriň giňligini sazlamaga we salgy setiriniň çepindäki ýörite nyşan arkaly dolandyrmaga mümkinçilik berýär. Bu funksiýa wideoaragatnaşyklar, resminamalar ýa-da bellikler bilen bir wagtda işlemek üçin niýetlenendir.
PDF resminamalaryny görmek üçin niýetlenen içerki gurala redaktirleme serişdeleri goşuldy. Indi ulanyjylar tekstiň böleklerini aýratynlandyryp, onuň reňkini üýtgedip we düşündirişleri goşup biler.
Şeýle hem ýokarky panelde faýllary göni «Google Disk» platformasyndaky «Chrome-dan ýatda saklananlar» bukjasyna ýüklemek üçin ýörite düwme peýda bolar.
Täze funksiýalar Chrome 145 wersiýasynyň çykmagy bilen giň ulanyjylar köpçüligine elýeterli bolar.
