Google 2025-nji ýylda müňlerçe işläp düzüjini we millionlarça şübheli goşundyny bloklady

2025-nji ýylda Google kompaniýasy giň gerimli arassalaýyş işlerini geçirip, düzgünleri bozan 1,75 milliondan gowrak goşundynyň Play Store-a ýüklenmeginiň öňüni aldy we zyýanly goşundyny ýerleşdirmek islän 80 müňden gowrak işläp düzüjiniň akkauntyny ýok etdi.
Kompaniýanyň wise-prezidenti Wijaý Kazanyň hasabatyna görä, bu işde esasy gural hökmünde emeli aň çykyş etdi. Ol indi gönüden-göni goşundylary barlamak işine ornaşdyryldy we hünärmenlere zyýanly shemalary çalt tapmaga kömek edýär.
Kompaniýa gizlinligi goramak meselesine-de aýratyn üns berdi: geçen ýyl ulanyjylaryň şahsy maglumatlaryna artykmaç ygtyýarlyk soraýan 255 müňden gowrak goşundy bloklandy. Şeýle hem kompaniýa 160 million spam-baha bermeleri we seslenmeleri, şol sanda galp bäş ýyldyzlary we goşundylaryň reýtinglerini guramaçylykly peseltmek synanyşyklaryny bloklady.
Howpsuzlyk çäreleriniň güýçlendirilmegi Android-iň içerki goragyna hem degişli boldy: Google Play Protect ulgamy indi her gün 350 milliardan gowrak goşundyny barlaýar we geçen ýylyň dowamynda resmi dükanyň daşynda elýeterli bolan 27 million zyýanly goşundyny ýüze çykardy.
2025-nji ýylda galplyga garşy kämilleşdirilen gorag 185 bazary we 3 milliarda golaý enjamy gurşap aldy we töwekgelçilikli goşundylary gurnamak boýunça 266 million synanyşygyň öňüni aldy.
Google kezzaplyk maksatly jaňlar bilen göreşmek üçin hem üýtgeşmeleri girizdi. Play Protect indi telefonda gürleşilýän wagty goragy öçürmäge ýol bermeýär.