Türkmenistanyň Hindistandaky ilçisi ýurduň ýerli atlar jemgyýetiniň wekili bilen duşuşyk geçirdi

2026-njy ýylyň 19-njy fewralynda Türkmenistanyň Hindistan Respublikasyndaky ilçisi Ş.Geldynazarow bilen Hindistanyň ýerli atlar jemgyýetiniň Ösüş we sport boýunça wise-prezidenti Sarpartap Singhiň arasynda duşuşyk geçirildi. Gepleşikleriň esasy mazmuny iki ýurduň arasynda atçylyk pudagyndaky gatnaşyklary ösdürmek mümkinçiliklerinden ybarat boldy. Bu barada Türkmenistanyň DIM-iniň metbugat gullugy habar berýär.
Duşuşygyň barşynda ilçi Türkmenistanyň dünýä meşhur ahalteke bedewlerini ösdürip ýetişdirmekde döwlet derejesinde amala aşyrýan işleri barada maglumat berdi. Aýratyn-da, 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» şygary astynda geçýändigi we bu mynasybetli guralýan möhüm çäreler hem-de her ýylyň aprel aýynda Türkmen bedewiniň milli baýramynyň giňden bellenilip geçilýändigi barada gürrüň edildi.
Sarpartap Singh Hindistanyň ýerli atlar jemgyýetiniň alyp barýan işleri bilen tanyşdyryp, türkmen tarapy bilen tejribe alyşmaga we atçylyk sportuny ösdürmekde hyzmatdaşlyga gyzyklanma bildirýändiklerini tassyklady. Taraplar bu ugurda özara bähbitli gatnaşyklaryň uly geljeginiň bardygyny belledi.