Barlagçylar topary gadymy dünýäniň ýedi täsinliginiň biri hasaplanýan Aleksandriýa (Faros) maýagynyň üç ölçegli sanly modelini döretmäge başladylar. Beýikligi 120 metre ýetip, Aleksandriýa limanynda ýerleşen bu maýak diňe Gizadaky Heops piramidasyndan (146,6 m) pes bolupdyr.
Maýagyň gurluşygy b.e. öň 323–282-nji ýyllarda Ptolemeý I Soter tarapyndan başlanyp, onuň ogly Ptolemeý II Filadelf tarapyndan tamamlandy. Daşdan gurlan bina gönüburçly esasa, sekizgyraňly orta bölege we gämileri ugrukdyrmak üçin ot hem-de aýna ulgamy bilen üpjün edilen silindr şekilli diňe eýe bolupdyr.
16 asyryň dowamynda birnäçe ýer titremesini başyndan geçiren maýak, 1323-nji ýyldaky weýrançylykly sarsgynda doly diýen ýaly ýykylypdyr. XIV asyryň ahyryna çenli bolsa onuň galan bölekleri gurluşyk serişdesi hökmünde sökülip alyndy.
Pharos taslamasyna arheologlar, binagärler we programmaçylar gatnaşýarlar. Geçen ýylyň dowamynda olar deňziň düýbünden skanirlemek üçin granit bloklaryny çykardylar we 5 müňe golaý binagärlik bölegini hasaba aldylar. Tapylan tapyndylaryň arasynda grek gurluşyk usullary bilen müsür bezeglerini utgaşdyrýan sütün hem bar.
Suwuň aşagynda görşüň pes bolýandygy we deňiz düýbüniň büdür-südürligi zerarly barlagçylar maýagyň asyl keşbini doly dikeltmegiň onlarça ýyla çekip biljekdiginden ätiýaç edýärler.
Alymlar gadymy dünýäniň ýedi täsinliginiň biriniň sanly modelini döredýärler
- düýn 22:40
- 1.2k+
