Ady belli BTS k-pop toparynyň agzasy V (Kim Tehen) «Layover» atly ilkinji solo albomy bilen täze rekord goýdy. Big Hit Music-iň habar bermegine görä, bu albom Spotify-da jemi 2,5 milliard gezek diňlenildi.
Üstesine-de, albomdaky aýdymlaryň her biriniň diňlenme sany platformada 100 milliondan geçdi.
2023-nji ýylyň 8-nji sentýabrynda çykan albom şeýle netijäni takmynan iki ýarym ýylda görkezdi. Aslynda «Layover» çykan ilkinji günlerinden ABŞ-nyň meşhur «Billboard 200» sanawynda ikinji orna çenli ýokary galypdy. Iň geň galdyryjy tarapy bolsa, albomdaky alty aýdymyň hemmesiniň-de «Billboard Global 200» we «Global Excl. US» hit-paradlaryna girmegidir.
Aýratyn-da, onuň «Love Me Again» aýdymy Amerikanyň Ýazgy Senagaty Assosiasiýasy (RIAA) tarapyndan altyn sertifikat bilen sylaglandy we 2024-nji ýylyň dekabryna çenli 1 milliard diňlenmä ýetip, platformanyň meşhur «Billions Club» sanawyna girdi. Bu meşhur aýdym bilen bile «Slow Dancing» aýdymy Kanada we Täze Zelandiýada altyn sertifikatlara hem mynasyp boldy.
V hakdaky bu gowy maglumatlaryň üstüne, köp sanly muşdaklary garaşdyran, BTS toparynyň doly düzümde işe başlaýandygy hakyndaky habary hem goşmak gerek. Ýedi agzasynyň hemmesi-de hökmany harby gullugyny tamamlap geleninden soňra, topar 2026-njy ýylyň 20-nji martynda täze albomyny hödürlär. Bu BTS-iň soňky alty ýylda ilkinji albomy bolar.
BTS-däki V Spotify platformasynda 2,5 milliard gezek diňlenip, rekord goýdy
- 19.02.2026 19:03
- 2k+
