Penşenbä geçýän gije UEFA-nyň Çempionlar ligasynyň pleý-off (utulan çykdy) tapgyrynyň duşuşyklary geçirildi. «Nýukasl» Bakuda uly hasap bilen ýeňiş gazandy, «Baýer» we «Budýo-Glimt» iki gol aratapawudy bilen üstün çykdylar, «Brýugge» bilen «Atletikonyň» duşuşygy bolsa 6 golly oýunda deňme-deňlik bilen tamamlandy.
«Garabag» — «Nýukasl» 1:6
Iňlis kluby myhmançylykda ynamly oýun görkezdi. Duşuşygyň baş gahrymany eýýäm birinji ýarymda poker (bir oýunda 4 gol) eden Entoni Gordon boldy. Arakesmeden soň ýer eýeleri bir gol bilen jogap berdiler, emma Jeýkob Mýorfi tiz wagtda bäş gol aratapawudyny dikeltdi.
«Olimpiakos» — «Baýer» Lewerkuzen 0:2
Myhmanlar gollaryň ikisini hem ikinji ýarymda urdular. Patrik Şik üç minudyň dowamynda iki gezek tapawutlandy.
«Budýo-Glimt» — «Inter» 3:1
Norwegiýaly topar öz meýdançasynda Çempionlar ligasynyň geçen möwsüminiň finalynda oýnan italýan klubundan üstün çykdy. Ýer eýeleri çalt guralan kombinasiýalar arkaly garşydaşyň goragyny üç gezek böwsüp geçmegi başardy. «Inter» arakesmäniň öňüsyrasynda bir gol bilen jogap berdi, emma oýnuň gidişini üýtgetmegi başarmady.
«Brýugge» — «Atletiko» Madrid 3:3
Bu duşuşykda garşydaşlar tomaşaçylary gol bolçulygy bilen begendirdiler. Myhmanlar oýnuň dowamynda iki gezek öňe saýlansalar-da, belgiýalylar ahyrsoňy 89-njy minutda hasaby deňlemegi başardylar.
Jogap duşuşyklarynyň tertibi
24-nji fewraldan 25-nji fewrala geçýän gije:
- 22:45 | «Atletiko» — «Brýugge»
- 01:00 | «Baýer» — «Olimpiakos»
- 01:00 | «Inter» — «Budýo-Glimt»
- 01:00 | «Nýukasl» — «Garabag»
25-nji fewraldan 26-njy fewrala geçýän gije:
- 22:45 | «Atalanta» — «Borussiýa» Dortmund
- 01:00 | «Ýuwentus» — «Galatasaraý»
- 01:00 | «Pari Sen-Žermen» — «Monako»
- 01:00 | «Real» — «Benfika»
