Hindistanyň Bäsdeşlik baradaky komissiýasy (CCI) Intel korporasiýasyny bazardaky agdyklyk edýän ornundan bikanun peýdalanmakda aýyplady we kompaniýa takmynan 30 million dollar möçberinde jerime saldy. Komissiýanyň hasabatyna görä, Intel-iň Hindistandaky şahamçasy 2016-njy ýylyň aprelinden 2024-nji ýylyň apreline çenli "kemsidiji kepillik syýasatyny" ýöredipdir.
Meseläniň esasy sebäbi, Hindistanyň çäginden daşarda satyn alnan prosessorlaryň (CPU) kepillik hyzmatyndan Hindistanda peýdalanyp bilinmezligidir. Hindistanly ulanyjylar daşary ýurtdan getirilen prosessorlary kemçilikli çykan ýagdaýynda, olary abatlamak ýa-da çalşyrmak üçin satyn alan ýurduna yzyna ibermäge mejbur edilipdir.
CCI bu tejribäniň diňe bir sarp edijileriň hukuklaryny däl, eýsem "paralel importçylaryň" işini hem kynlaşdyrýandygyny anyklady.
Intel-iň Hytaýda we Awstraliýada hiç hili çäklendirmesiz "global kepillik" hyzmatyny hödürleýändigi, Hindistandaky şertleriň kemsidijidigini subut etdi.
Aslynda jerimäniň mukdary has ýokary bolup bilerdi — komissiýa zyýany kompaniýanyň ortaça dolanyşygynyň 8%-i möçberinde bahalandyrypdy. Emma Intel-iň 2024-nji ýylyň 1-nji aprelinden başlap bu syýasaty öz meýli bilen bes edendigi sebäpli, jerime möçberi azaldyldy.
Jerime tölemekden başga-da, Intel Hindistanda giň gerimli maglumat kampaniýasyny geçirmäge, bu kemsidiji kepillik syýasatynyň doly ýatyrylandygyny resmi taýdan yglan etmäge we görlen çäreler barada hasabat bermäge mejbur edildi.
